معك حق نحنا شعب ساذج.. صدقيني لو ما هيك، ما كانت عيلتكم هلق حاكمة البلد!
ردت الناشطة لارا صقر على ميراي عون ابنة الرئيس عون التي وصفت الشعب اللبناني بالساذج في معرض حديثها عن أزمة الطائرة الرئاسية.
الى ميراي عون ابنة ومستشارة رئيس الجمهورية ميشال عون!
معك حق.. الشعب اللبناني شعب ساذج وساذج جدا، بس خليني خبرك ليش!
لما هيك بوطة توصل للحكم اكيد نحنا ساذجين!
لما نسكت على كل الفضايح تبعكم اكيد نحنا ساذجين!
لما تقتلونا بالمحارق والمياة “البرازية” والهوى المسرطن ونموت عالساكت.. اكيد نحنا ساذجين!
لما نسمح يوصل شخص للرئاسة سبق ووصفنا بالشعب “الغشيم” و “الطز” اكيد نحنا ساذجين!
لما ننقبر نهاجر لنهرب منكم ومن فسادكم اكيد نحنا ساذجين!
لما نرضى بعيشة الذل ونسكت اكيد نحنا ساذجين!
لما سفرية رئيس ب٦٠ شخص تمرق بلا ما يتحرك مجلس شورى الدولة.. اكيد نحنا ساذجين!
لما تاخدوا ملايين الدولارات لتجيبو الكهربا.. وتروح الكهربا نهائيا ونضل ساكتين اكيد نحنا ساذجين!
لما تستولوا ع كل المراكز بالدولة وتحكموا “عن انتقام” ونرضى بهالشي.. اكيد نحنا ساذجين!
معك حق نحنا شعب ساذج.. صدقيني لو ما هيك، ما كانت عيلتكم هلق حاكمة البلد!
