نديم الجميل يسأل عن مصدر الأموال التي يحصل عليها “حزب الكتائب” وكيف مندعي للمحاسبة بالحكومة ومنرفض المحاسبة بالحزب؟

سأل النائب نديم الجميل عن مصدر الأموال التي يحصل عليها “حزب الكتائب” وكيفية صرفها، داعياً إلى انتخاب رئيسٍ للكتائب مباشرة من الكتائبيين.

وقال الجميل في المؤتمر الكتائبي: “هيدا المؤتمر قابل للطعن أمام الهيئات الحزبية، وأمام القضاء إذا لزم الأمر. وبالتالي أنا من اليوم بعلن الطعن بكلّ التوصيات والقرارات والانتخابات والتعيينات يللي بدا تصدر عنّو. مين مسؤول عن الهزائم والنكسات والفشل؟ الملائكة؟ الطليان؟ إنتو اليوم يللي عم تجدّدو لحالكن مسؤولين عن الحالة يللي بلغها الحزب. كيف مندعي الدولة إلى الإصلاح ونحنا ما منصلح بالحزب؟ كيف مندعي الدولة تكون ديمقراطية ونحنا منخنق الديموقراطية بالحزب؟”.

وأضاف: “كيف مندعي للمحاسبة بالحكومة ومنرفض المحاسبة بالحزب؟ هل بتظنّو إنو الأمور راح تسلم معكم على طول؟ معاشات 5 رفاق لإلنا بالبيت المركزي، بتساوي موازنات ثلاث أقاليم أساسية، أو بتساوي موازنات إقليم الشمال والجنوب مجموعين مع بعضهم… وعن أي تقرير مالي جايين تحكونا اليوم. وأساسًا من وين مصدر المال؟؟؟؟ بجاوبونا من متبرعين أي متبرعين؟؟؟ لبنانيي؟ أجانب؟ أفراد؟ شركات؟ جمعيات؟ دول؟ شو الغاية من إنو هالناس عم بيتبرعوا؟ ما في جواب… بس… في تقرير مالي غير شفاف…”.

وتابع: “ليش سألت عن الموازنه كمان ؟؟؟؟ لأن بيوت الكتائب مسكّرة وما فيها حياة. ونحنا من مهرجان لمهرجان… إضاءة وصوت وأجارات وديكور وفذلكات فنّية. المهمّ الاستعراض وعلى الأرض ما في شي… trompe l’oeil. وين الناس وين القواعد وين الأنصار والأصدقاء… وصلت لانه نعمل مهراجانات انتخابية بلا ما نسمح للمرشّحين يطلعوا على المسرح قبل الانتخابات الأخيرة والرفاق متروكين بلا رعايه وبلا خدمات وبلا مساعدات شو صار دور الكتائب اليوم؟؟ مركز رصد الفساد والكوميسيونات؟؟ أم جمعيّة بيئية؟؟؟”.