أهالي البترون يطلقون صرخة: كفى

على مدى ثلاث سنوات والقصة تتكرر إقامة مهرجان عيد الميلاد في الأحياء السكنية وزرع ساحات الكنائس بالكيوسكات وإقفال الطرق على الاهالي وعجقة وهرج ومرج في الطرقات مضافا إليها عجقة التوك توك والغولف كار والموبيلاتات، ما لحقنا وخلصنا من عجقة و فوضى الصيف حتى أطلقت لجنة المهرجانات نفير مهرجان العيد في الأحياء السكنية ، خلصنا بقى يا جماعة من الفوضى والعجقة نبشوا عن محل ملائم لإقامة مهرجناتكم متل الطريق من مطعم لبنان وحتى محلات حلمي وتوابعها من مواقف السيارات هناك ما بتزعجوا ولا بتمنعوا الاهالي من الوصول لبيوتهم وبتكونوا بأقرب نقطة جغرفيأ للأسواق القديمة والشارع العام .
اما السبب فهو لانو الجماعة مع اصحابهم عندهم عقارات بالمنطقة بدهم يشغلوها بخاصة هالسنة بسبب الأحداث الامنية الجارية توقفت اشغالهم من اكتر من شهرين .
الاهالي لهم بهالحالة اقله ٣ اسابيع كل ويك اند بينزربوا ببيوتهم وإذا تجرأ وحدا طلع بسيارتو ليشتري غرض من السوق يقضي اكتر من ساعة بالعجقة والفوضى حتى يرجع لبيتو ولقدام بين العيدين بصير كل الاسبوع على هالحالة بيكفي بقى طلعتوا الناس من تيابها أوقفوا تعدياتكم على حقوق الاهالي بالاحياء السكنية في المدينة القديمة منعيدها ومنكررها ورح نرجع نكررها ، المشاريع والمهرجانات ما بتنقام بأحياء سكنية مكطظة ، ما بقى قادرين نتحمل مشاريعكم وفنونكم وعارفين أنو كل هدف يلي خلفكم اخراجنا من بيوتنا ودفعنا لبيعها وتأجيرها لسماسرتهم .
ما بيقدر الاعلام المأجور يلي بروج لمشاريعكم يطمس حقيقة سحق حقوق الاهالي يلي بيحميها القانون اللبناني بشكل واضح ، واخيرا” ما رح تقدروا تنالوا من عزيمتنا وصمودنا بيجي الوقت ومنحاسبكم عكل تعدياتكم .
للمسؤولين عن المدينة يلي بيتحفونا بالحكي بالقانون وتطبيقه يتفضلوا ويطبقوا القانون بالمدينة ويحفظوا حقوق وراحة الاهالي هيدي ابسط الأمور وهيدا واجبهم وسبب لوجودهم بالسلطة !! ، منذكرهم : ” الانماء ما بتكون ضريبتو هدر حقوق أهل المدينة واقلاق راحتهم وتسكير الطرق العامة عليهم واحتلال الساحات العامة ” .
دعوة لكل الاهالي ما تتاخدوا وتنبهروا بالزينة وبالدعايات والنشاطات الشعبوية المبهرة والهدايا والجوايز المدفوع حقها سلفا” والمقابلات الإعلامية المنسقة والمحضرة والمدروسة ، هي منها إلا خطة محكمة لإلهائكم عن المطالبة بحقوقهم ولتمرير مصالحهم الخاصة على ضهر حقوكم وراحتكم وعيشكم الهني والجمعيات المنظمة للمهرجان منها الا الواحهة لمخططهم الخفي والخبيث ويلي ذكرناه أعلاه وفي مقالات سابقة ” سوليدار البترون ” .

موقع اوفياء البترون على الفايسبوك