المسيحيين بدهم الفيدرالية… أنا محلهم بطالب بالإنفصال كلياً.
كتب ربيع العلي :
بيطلعلك كم غبي وبيقلك المسيحيين بدهم فيدرالية.
أنه أقل شي يا غبي يطالبوا بالفدرالية،
لأن أنا محلهم بطالب بالإنفصال كلياً.
من ال ٤٣ لليوم ونحن منمثل دور الضحية ونحن بالحقيقة الجلادين…
١-جبنا الفلسطيني وحكمنّاه بالبلد واستقوينا فيه ع اللبنانية اللي متلنا،
والجماعة ما طالبوا للحظة إلا بلبنان.
٢- استقوينا بعبد الناصر وصرنا بدنا الوحدة وبدنا نلغي الدولة،
وما شفنا منهم إلا انحياز للدولة وللبنان.
٢- ورجعنا جبنا السوري وكمان استقوينا فيه ونكلنا فيهم وحبسناهم،ونفيناهم،
والجماعة ولا مرة طالبوا إلا بلبنان.
٣- تعاونا مع السوري لأقصى الحدود واستفدنا من وجوده وضربنا بسيفه، ورجعنا صرنا ضده، والجماعة أخدونا بالأحضان ونسوا كل تاريخنا طالما عدنا إلى لبنان.
٤- جبنا الإيراني باسم الدين وحكمنّاه كمان بالبلد وأخدناهم ع خيارات دينية ضد تفكيرهم.
وكمان ما شفناهم إلا عم يحكوا بالدولة وبلبنان.
٥- منفتحلهم جبهة حرب ومندمر البلد وقت اللي بيناسب إيران،
وممنوع عليهم أنه يعترضوا أو يناقشوا.
٦- جبنا داعش والنصرة وحضناهم لنعمل توازن سني شيعي وهني عم يتفرجوا ع صراعات حقدنا اللي عمرها ١٤٠٠ سنة.
٧- حطينالهم مكبرات صوت بنص مناطقهم وصرنا بدنا نسمعهم خطبة الجمعة وآذان الصبح الساعة ٤ الصبح بالقوة وبأعلى صوت هني وقاعدين ببيوتهم.
٨- رحنا قعدنا مع الشاغوري وبعناهم وبعنا الرئاسة بالثمن اللي دفعه ورجعنا اتهمناهم بالخيانة والغدر وأخدنا دور الضحية ،والمظلومين.
ونحن بالحقيقة بعنا وقبضنا الثمن،بس الحزب كان ورا عون بهيدا الموقف.
٩- بدنا نتهمهم بالخيانة والغدر والعمالة،ونحن ما خلينا خيانة وعمالة وغدر وما عملناهم،إلا من رحم ربي.
١٠- بدنا نقول عنهم الكفّار وبدنا نضرب عقيدتهم بالصميم وبدنا نسميلهم ربهم ع ذوقنا ومتل ما بدنا.
(يعني مثلا أنا اسمي ربيع وبيطلعلي واحد ومصمم يسميني بديع وأنا مفروض أسكت وأشكره).
١١- آخر شي منجي منلعب فوتبول بجونية منفش حقدنا وكرهنا اللي عمره ١٤٠٠ سنة بالملعب اللي الجماعة مرتبينه ومزبطينه.
يا أخي ببساطة كتر خيرهم الجماعة اللي بيقبلوا يعيشوا معنا.
المشكل عنا وفينا، لأن بحياتنا ما اعتبرنا البلد بلدنا، نحن منعتبره مزرعة وعم ننهش فيها.
